شوفوا علم مصر

أمانة عليكوا حد يقولى ان محدش من العاملين فى هذة المدرسة خد بالة ان علم مصر واقع بالشكل دة نفسى اطلع اعدلة بس صاحبتى قالت لى يا مجنونة هتضحكتى الناس عليكى فى الشارع

جهل وقلة أدب

بالامس شاهدت أعلانين على القناة المحلية واحد من أبو 0900 وكان السؤال ما هو المعبد اللى على الجنية المصرى ونختار من 3 أجابات ( معبد الكرنك -معبد الأقصر-معبد حتشبسوت ) والاجابة الصحيحية اساساً ولا واحد من دول لانها معبد أبو سمبل وهو دة الجهل بعينة ودة أكبر دليل على نصب هذة الشركات لانة اللى هيجاوب هيكسب على أساس؟؟؟؟؟؟!!!!!!!!!!!!!!!!!! .

أما قلة الأدب أعلان تانى على أحد منتجات التخسيس حزام للبطن والفتيات المودل اللى فى الاعلان لابسين ملابس فاضحة او تقريباً كدة لابسين من غير هدوم ولا كاننا أصبحنا من دول اوربا عينى عليكى يا مصر أصبحنا زى ما بيقول عادل أمام فى فيلم "عمارة يعقوبيان " أصبحنا مسخ من تحت ومزابل من فوق أحنااااااااااا فى زمن المسخ .

عدستى الاقصرية

معرفش ليه العمرتين دول بيفكرونى بعمارات وسط البلد فى القاهرة

حكاية ابو ايه

زجل : نرمين نجدى

أسمعوا يا ناس الحكاية من البداية للنهايــــــــــــــــــة
حكاية أبو آيه اللى لا كانت فى البال ولا النوايــــــــــــا
وأم محمود الداية أشتكت من الروحـــــــــــة والجايـــة
على بـــــــــــــــيت الســـــــــــــــت ام آيـــــــــــــــــه
اللى كل شــــــــــــــــوية فـــــــــــــية حكــــــــــــــايه
قال ايـــــــــــــــــــــــة عاوزين يخــــــــــــــاووا ايـــــــه
ومالــــــــــــو كل تسع شهـــور يندهوا للـــــــــــــدايه
عايـــــــــــــــــزين ولد ويكــــــــــــون هدايـــــــــــــــه
على اسم المغـــــــــــــــــــــــفور له جــــــــــــد آيـه
عينى عليـــــــــــــك يا ابـــــــــــن هدايـــــــــــــــــــة
بقــــــــــــــــــــــــيت بين الخـــــــــــــــلق روايــــــــة
وأم آيه خلاص تعبت وندمت وحست بالنهــــــــــــايـة
لكن قررت تتغلب على مشكلتها وراحت محو الاميـة
وقبل دة ودة راحت الوحـــــــــــــــــــــــــدة الصحـــية
وقعدت توعى ستات قريتها على مصيبتها ديـــــــة
وتلعن كتر الخلفة والعـــــــــــــــــــــــــــادات الباليــة
ويا ريت ما نقلد أبو آيه لا مواردنا مش كفايـــــــــــــة
ودة بس كان مجمل الحكايه من البداية للنهـــايــــة

الهلال مع الصليب

المنظر دة تشوفوة من عندى من البلكونة عشان كدة انا عزماكو عندى ع (الفايف كلوك تى) ونشوف تعانق مأذنة مسجد أحمد النجم مع كنيسة الكاثوليك

قصة مصورة عن الشحاتة فى الأقصر

للاسف التحميل نزل الصور بالقلبة أقراءو من تحت لفوق عشان الترتيب وشكرا

5/ الرعب ظاهر ع الأجانب بيحاولوا يتحصنوا منه بغلق النوافذ جيداً . أنتهت القصة وهى مهداة للمسئولين فى الأقصر نرمين نجدى

4/ أبتدوا يأخدوا بالهم منه

3/ بدأ فى فتح النوافذ والخوجات لسه مش واخدين بالهم برضة

2/ بيخبط ع الباص ممكن كلمة من عيل غلبان زييى

1/كان ماشى ووقف فجأة بيشاور عقلة أشحت ولا لا؟؟؟؟؟؟؟

القصة أمام أحدى البازارات المواجهة لفندق الشرطة 25 يناير بشارع السيد يوسف صورة ممكن تطفش السياحة من أقصرنا الحبيبة وهى مهداة للمسئولين

واسف مرة تانية انها نزلت معكوسة

ودى برضة شوية زبالة كدة على ما قوسم جوة معبد الأقصر برضة

مصرع بطلة الأقصر ومصر فى المصارعة النسائية

الفقيدة اسماء يوسف عطيتو

لقيت بنت الآقصر وبطلة مصر فى المصارعة النسائية أسماء يوسف عطيتو 21 سنة مصرعها فى حادث سيارة هى وخطيبها الذى عقد قرآنه عليها منذ عدة أيام.كان ذلك أثناء قيام الفقيدة وخطيبها محمد حمدى حسن " جواهرجى" من سوهاج بالسفر بسيارة العريس لتجهيز عش الزوجية وشراء مستلزمات الزواج أنقلبت السيارة بهم فى ترعة بالقرب من نجع حمادى .وحصدت الفقيدة المركز الاول على مستوى الجمهورية لمدة خمس سنوات متتالية فى المصارعة النسائية ومتفوقة علمياً حاصلة على المركز الاول فى كلية التربية الرياضية .أدى حادث التصادم الى انقلاب السيارة فى الترعة ، وتم إستخراج السيارة وبها الجثث .

رحمة الله عليكى يا زهرة الاقصر

خفة دم أم قلة أدب ؟

صورة تجمع مشاهير قراء القران الكريم المصريين

أكيد أحنا الشعب المصرى مشهورين بخفة الدم وأطلاق النكات فى أحلك الظروف ، وعندنا أشخاص بيقلدوا أصوات المشاهير لكن اللى مش أكيد أن أحد الاشخاص الظرفاء حب يستخف أكتر فى دمه ويضحك الناس بطريقة جديدة شوية وهى تقليد أصوات مشاهير قراء القرآن الكريم أثناء القراءه وكانهم راكبين اتوبيس الشيخ المرحوم محمود خليل الحصرى سواق والشيخ الطبلاوى الكمسارى وبقية القراء الركاب المقطع منتشر ع الموبيلات ويتناقلة الشباب عبر تقنية البلوتوث للمزيد من الضحك والفرفشة ولا كاننا مسلمين الحقيقة انا كنت هرفق لكم المقطع هنا ع البلوج لكن قلت بلاش أساهم فى نشر رزيلة أسئل عنها يوم القيامة وهدنا اله وأياكم .